Xəzər TV-nin “İmtahan”ı başlayır

Xəzər TV sentyabr ayından etibarən həftə içi 5 gün yayımlanacaq “İmtahan” adlı serialın çəkilişlərinə başlayıb.

Bu barədə məlumatı Teleqraf.com-a serialda baş rollardan birini canlandıracaq aktyor Sənan Ellez deyib. O, filmin əsas mövzusunun tələbələrin həyatından və onların başına gələn maraqlı hadisələrdən bəhs edəcəyini bildirib: "Serialın adı "İmtahandır". Adından göründüyü kimi tələbə və universitet həyatı, onların təkcə tədrislə bağlı yox, həm də həyatda qarşılaşacaqları imtahanlarla bağlıdır. Mən həmişə istəmişəm ki, tələbəlik illəri ilə bağlı bir filmdə və ya serialda çəkilim.

Qismət bu ilə imiş. Baş rollardan birini canlandıracağam. Serialdakı adım Turaldır. Tural universitet tələbəsidir və əsas hadisələrin mərkəzində olacaq bir insandır. Hələ ki, məşq prosesində olduğumuz üçün daha ətraflı danışa bilməsəm də, bu teleserialın maraqlı olacağını və baxılacağını düşünürəm. Ölkənin gənc aktyor və aktrisalarının böyük əksəriyyəti bizimlədir. Uğurlu bir iş ərsəyə gətirəcəyimizə inanırıq".

Qeyd edək ki, serialın əsas ssenari müəllifi Valeh Əhmədov, quruluşçu rejissoru isə Ramin Nəbiyevdir.