Durum mürəkkəbləşir: Kim önə keçəcək - ABŞ, Rusiya, yoxsa Aİ?

“ABŞ və Avropa İttifaqının əllərində Rusiya kimi bölgəni qarışdıracaq alətləri yoxdur”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Azərbaycan və Ermənistan arasındakı sülh danışıqlarına diqqət çəkib:

“Kreml təmas xəttindəki (şərti sərhəddəki) toqquşmadan dərhal sonra Azərbaycan və Ermənistana Moskvada görüş təklifi edib. Qarşıdurmadan bir neçə gün əvvəl isə görüşün Vaşinqtonda keçirilməsi təklif olunmuşdu. Brüssel də növbədə gözləyir. Azərbaycan və Ermənistan liderləri arasında görüşün birinci hansı paytaxtda keçirilməsi uğrunda yarış başlayıb.

Bəs görüş məkanlarının önəmi və fərqi nədədir?

Moskva, Vaşinqton və Brüsselin hər üçü sözdə Azərbaycanla Ermənistan arasında sülh sazişinin imzalanmasını istəyir. Ancaq Kreml indidən tərəflərə mesaj göndərir ki, sülh sazişi Vaşinqton və ya Brüsseldə imzalanarsa, bu, uzunömürlü olmayacaq. Bu o deməkdir ki, sülh sazişi Qərbdə imzalanarsa, Rusiya buna müxtəlif yollarla mane olacaq, sərhəddə gərginlik azalmayacaq.

Bəs sülh sazişi Moskvada imzalanarsa, nə baş verəcək, Vaşinqton və Brüsselin reaksiyası necə olacaq?

ABŞ və Avropa İttifaqının əllərində Rusiya kimi bölgəni qarışdıracaq alətləri yoxdur. Bu, onlara lazım da deyil. Vaşinqton və Brüsselə Cənubi Qafqazda sülh və bölgə ölkələri arasında əməkdaşlıq, o cümlədən Rusiyanın təsirinin azalması lazımdır. Bu olacaqsa, ABŞ və Avropa İttifaqı məmnun qalacaq. Ancaq Kreml Azərbaycanla Ermənistan arasında barışın əldə olunmasını ona görə təmin etmək istəmir ki, bölgə ölkələri ABŞ və Avropa İttifaqı ilə əməkdaşlığı gücləndirməsinlər. Əksi Kremlin maraqlarına ziddir. Moskvada imzalana biləcək mümkün sülh sazişi bölgədə Rusiyanın təsir imkanlarını artırmağı hədəfləyir”.