PA rəsmisi: “Onlar “İnterpol” xətti ilə axtarışa verilib”

“Hazırda Azərbaycan dövləti Xocalı soyqırımı ilə bağlı siyasi iş, informasiya mübarizəsi aparır”.

Teleqraf.com xəbər verir ki, bunu Prezident Administrasiyasının (PA) İctimai-siyasi məsələlər şöbəsinin müdir müavini Ərəstun Mehdiyev bu gün Milli Məclisdə keçirilən “Beynəlxalq cinayətlərin qarşısının alınması və cəzalandırılması haqqında” qanun layihəsinin təqdimat mərasimində çıxışı zamanı bildirib.

PA rəsmisi deyib ki, Xocalı soyqırımı ən ağır cinayətlərdən biridir: “Öz səsimizi qaldırmışıq, ermənilərin Azərbaycana qarşı etdikləri ilə bağlı daim beynəlxalq ictimaiyyəti məlumatlandırmışıq. Azərbaycan bu sahədə iş aparır. Çox təəssüf ki, dünyada bu məsələyə lazımı hüquqi qiymət verilməyib. Yəni, bu iş bu gün də aktuallığını saxlayır. Ermənilərin Azərbaycana qarşı törədikləri cinayətlət, o cümlədən Xocalı faciəsi hər bir vətəndaşın, dövlət qurumunun qarşısında duran əsas məsələdir. Xocalı soyqırımı sülh və insanlığa qarşı ən ağır cinayət kimi qiymətləndirilir. Çalışmalıyıq ki, hüquqi müstəvidə mübarizə aparaq, haqq səsimizi dünyaya çatdıraq”.

Ə.Mehdiyev xatırladıb ki, bu məsələ ilə bağlı Azərbaycanın Hərbi Prokurorluğunda cinayət işi başladılıb, müvafiq işlər davam etdirilir: “Xocalıda cinayət törədən şəxslər hamıya məlumdur, onlar “İnterpol” xətti ilə beynəlxalq axtarışa verilib. Bu cinayəti Ermənistanda olan siyasi rəhbərlik edib. Bu gün onlar özləri də bunu açıq etiraf edirlər”.

PA rəsmisi qeyd edib ki, bir sıra dövlətlətlər Xocalı soyqırımını tanıyıb: “Bu informasiya mübarizəsi sahəsində aparılan işlərin nəticəsidir. Xeyli uğurlar qazanmışıq, amma təcrübə göstərir ki, bu, mübarizədə qalib çıxmaq üçün, torpaqların işğaldan azad edilməsi üçün kifayət etmir”.

Cavad