Metroda öpüşdüyü deyilən oğlan danışdı: “Qızı qorumaq üçün...”

Jurnalist Xaqani Səfəroğlunun metrodaki iki gəncə təpkisi ilə bağlı yazdığı status ciddi müzakirələrə səbəb olub. Jurnalistin mövqeyini dəstəkləyənlərlə yanaşı, ona qarşı çıxanlar da az deyil.

Teleqraf.com xəbər verir ki, cebhe.info metroda jurnalistin qınağına tuş gələn gənclərdən birinin - daha doğrusu, oğlanın açıqlamasını yayıb. O, cebhe.info-ya müraciət edərək yaranmış vəziyyətdən ciddi narahatlığını çatdırıb. Adını müəyyən səbəblərdən açıqlamadığımız gənc yanındakı qızın da vəziyyətdən narahat ola biləcəyini deyib və onu qorumaq üçün internet imkanlarını məhdudlaşdırdığını vurğulayıb.

Eyni zamanda metroda öpüşdükləri barədə deyilənləri rədd edib: “Hərə bir şey yazır, çoxu da söyür. Niyə söyürlər axi? Biz pis bir şey etməmişik. Heç öpüşməmişik də. O dayı da (Xaqani Səfəroğlunu nəzərdə tutur-red.) qarşımızda idi, bizə baxırdı, mən qızın əlindən tutmuşdum. Gördüm ki, dediklərimi eşidir, qızın qulağına demək üçün əyildim. O da ayağını yerı çırpdı. Yazırlar ki, guya təpik atıb. Amma o jurnalist ayağını yerə çırpdı.

Qışqırdı ki, uşaqlar var, nə edirsiz? “Ay əmi” dedim. Amma susmadı. Mən rus bölməsində oxumuşam, danışanda da hiss edilir. Qız da qorxdu, istəmədim məsələ böyüsün. “28 May” stansiyasında qatardan çıxdıq.

Mənə pis gəlir axı. Hamı da öz yanımda danışır, söyürlər ki, guya metroda öpüşmüşük. Amma o jurnalist də yazmayıb ki, öpüşmüşük. (Xatırladaq ki, Xaqani Səfəroğlu da statusunda gənclərin öpüşdüyünü yazmayıb, ancaq müzakirələrdə məsələ belə hallanıb- red.).

Mən qızın qulağına söz deyirdim ki, bizi eşitməsin, birdən hay-küy saldı. Bizə də təpik vurmayıb, ayağını yerı çırpıb”.

Həmsöhbətimiz deyib ki, indi yeganə istəyi məsələnin müzakirəsinə son qoyulmasıdır: “İstəmirəm ki, bundan artıq müzakirə etsinlər. Söz-söhbət gedib çatsa, o qızın halını da düşünün”.

Sayt qeyd edirki, gəncin sosial şəbəkədəki ünvanı və digər əlaqə vasitələri redaksiyadadır.