Bir çox məşhurun evi külə döndü - Mel Gibson, Entoni Hopkins və...

ABŞ-nin Los-Anceles şəhərində yanğınsöndürmə işləri davam edir. Ölənlərin sayı 16-ya yüksəldiyi üçün şəhərin qubernatorlar şurası yeni seçilmiş prezident Donald Trampı əraziyə səfər etməyə və dəstəyini göstərməyə çağırıb.

Teleqraf.com xarici KİV-ə istinadən xəbər verir ki, 10 mindən çox tikili alov nəticəsində dağılıb, çoxlu sayda insan bölgədən təxliyə edilib.

Hollivudun bəzi məşhur şəxsləri evlərini tərk etməli olublar. Bir çox ulduzların malikanələri kül olub.

BBC-nin verdiyi məlumata görə, Los-Anceles bölgəsində baş verən meşə yanğınlarında evlərini itirən məşhurlar arasında aktyor Entoni Hopkins, Ceff Brics və Mel Gibson da var.

Ceff Brics valideynlərindən miras qalan Malibudakı evini itirib. Mel Gibson isə Malibudakı evinin tamamilə yandığını açıqlayıb.

Entoni Hopkins və həyat yoldaşı "Pasifik Palisades" adalarında baş verən yanğında iki ev itirdiklərini deyib. O instaqramda paylaşdığı mesajda "Özümüzlə apardığımız tək şey verdiyimiz sevgidir" yazıb.

Evlərini itirən digər məşhurlar arasında Paris Hilton, Billy Kristal, Adam Brodi də var.