Paşinyanla görüşdə dəstək mesajı: “Yanınızdayıq”

Ermənistan Baş nazir Nikol Paşinyan Fransa xarici işlər naziri Stefan Sejurnla görüşüb.

Teleqraf.com xəbər verir ki, baş nazir İrəvanda baş tutan görüşdə Fransa ilə əlaqələrin, o cümlədən təhlükəsizlik və iqtisadiyyat sahələrində daha da inkişaf etdiriləcəyini vurğulayıb.

“Bizim strategiyamız belədir: öz suverenliyimizi, müstəqilliyimizi, dövlətçiliyimizi gücləndirmək və möhkəmləndirmək istəyirik və bu yolda Fransanın dəstəyini yüksək qiymətləndiririk”, - Nikol Paşinyan bildirib.

Sejurn da Ermənistan-Fransa əməkdaşlığının təhlükəsizlik və iqtisadi sahələrdə ardıcıl inkişafının vacibliyini vurğulayıb: “Fransa Ermənistanın yanındadır və erməni xalqına dəstəyini davam etdirəcək, iki xalq arasında münasibətlərin möhkəmlənməsi üçün bütün səyləri göstəririk”.

Görüşdə Ermənistan-Azərbaycan sülh müqaviləsi ilə bağlı danışıqlara, eləcə də regionda gedən proseslərə də istinad edilib.