Qocanın anası Fədayə Laçından danışdı... - Evindən Fotolar/Video

13:33

Bakıda keçirilən xüsusi əməliyyat zamanı ölən Qoca ləqəbli kriminal avtoritet Etibar Məmmədovun yas çadırı qurulub.

Teleqraf.com-un Hacıqabula ezam edilən əməkdaşının verdiyi məlumata görə, hələlik Qocanın cənazəsi ailəsinə təhvil verilməyib.

Anası bildirib ki, onun dəfn mərasiminə hazırlıq görülür, yas çadırı qurulub və mərhumun yaxınları Etibar Məməmdovun nəşinin təhvil verilməsini gözləyirlər.

Qeyd edək ki, mərhumun anası və qardaşı Hacıqabul rayonu, İsrafil Məmmədov küçəsi, 28 ünvanında yaşayır.

***

Qocanın anası Svetlana Məmmədova Teleqraf.com-a bildirib ki, onun 6 övladı olub:

"5 oğlum, 1 qızım vardı. Qızım rəhmətə getmişdi. Bir oğlum daha əvvəl dünyasını dəyişib. Etibar da belə oldu. İki oğlum həbsdədir. Digər oğlum isə yaxınlarda azadlığa çıxıb. Övladlarımın ən kiçiyi Etibar idi. Ən sevimli övladım idi. Uşaqlığı yaxşı keçib. İlk dəfə 16 yaşında həbsə düşdü. Kərbala ziyarətində olub. Qəzəllər yazırdı. İki kitabı çıxıb: "Mirvari damlalar" və "Gözlədiyim illər". Daha bir kitabı çapa hazırlanırdı".

Svetlana Məmmədova Qocanın müğənni Fədayə Laçınla münasibətlərindən də danışıb:

"Onlar dost idilər. Fədayə bir dəfə bizim rayonda olub. Hacıqabula toya gəlmişdi, sonra da Etibarla görüşmüşdülər".

Yaş yerindən hazırlanan daha geniş reportajı sabah təqdim edəcəyik. Teleqraf.com-y izləyin!