9 İyun 2015 02:57
597
12 Punto 14 Punto 16 Punto 18 Punto

“Bakı-2015” birinci Avropa Oyunlarının iyunun 12-də keçiriləcək açılış mərasimi dünya idmanının ən təcrübəli və tanınmış peşəkarlarından sayılan xanım Katerina Uqvu tərəfindən təşkil edilən genişmiqyaslı tədbirlərlə müşayiət olunacaq. Əslən Mançesterdən olan K.Uqvu 2002-ci ildə doğma şəhərində keçirilmiş tədbirdən etibarən beynəlxalq idman aləmində mərasimlərin peşəkar prodüserinə çevrilib.

“Bakı-2015”-dən AZƏRTAC-a bildiriblər ki, o, Mançester stadionunda XVII birlik oyunlarının bağlanış mərasimindən sonra 2006-cı ildə Qətərin paytaxtı Dohada keçirilən XV Asiya Oyunlarının açılışının da təşkilatçısı olub. Bundan əlavə, K.Uqvu 2010-cu ildə Vankuver Qış Olimpiya Oyunlarının açılış və bağlanış mərasimlərinin strateji hissəsinin baş prodüseri kimi mühüm vəzifənin öhdəsindən bacarıqla gəlib.

O, “Bakı-2015”-dən əvvəl 2012-ci ildə Londonda keçirilən Olimpiya və Paralimpiya Oyunları üzrə mərasimlərin icraçı prodüseri olub. K.Uqvu London Olimpiadasına verdiyi mühüm töhfəsinə görə 2013-cü ildə Britaniya İmperiyası Ordeni ilə təltif edilib.

“Bakı-2015” Əməliyyat Komitəsinin əməliyyatlar üzrə baş direktoru Saymon Kleq bu barədə deyib: “Bakıda ilk Avropa Oyunlarını təşkil etmək istiqamətində geniş təcrübəyə malik K.Uqvu ilə işlədiyimiz üçün bəxtimiz gətirib. Katerina son 20 ildə bu işlərdə böyük nüfuz qazanıb. Onun adı dünya idman sahəsinin ən yaddaqalan mərasimlərində çəkilir”.

K.Uqvu bildirib: Tədbiri təşkil edən ölkənin mədəni irsinin təbiətinə görə hər bir mərasim özünəməxsus olmalıdır. “Bakı-2015” də fərqli olacaq. Azərbaycan gənc ölkə olsa da, öz mədəniyyəti ilə fəxr edir və bu da mərasimdə əks etdiriləcək.

Bizim komandanın bacarıqlı üzvləri ilə yanaşı, açılış mərasiminin tərtibatçısı, bədii direktorumuz Dimitris Papayoannou və bağlanış mərasiminin bədii direktoru Ceyms Hadli də fəaliyyət göstərirlər. Eyni zamanda, yüksək istedada malik azərbaycanlı gənclərdən ibarət könüllülər də bizə dəstək verirlər. Bakı Olimpiya Stadionunun heyrətamiz quruluşu bu ölkənin idman tarixində ən möhtəşəm gecə üçün əla proqram hazırlamağa imkan verir”.

Katerina Akkra, Adelaida, Antverpen, Los-Anceles, Mexiko və Nyu-Yorkda bir çox beynəlxalq incəsənət festivallarının tərtibatçısıdır. O, 1997-ci ildə canlı incəsənət üzrə inkişaf agentliyini təsis edib, 2001-ci ildə isə agentliyin direktoru olub. K.Uqvu 1991-ci ildən 1997-ci ilədək proqramlaşdırma, kuratorial və tapşırıqların verilməsi ilə bağlı tədbirlər keçirməklə Londonda, Müasir İncəsənət İnstitutunun canlı incəsənət şöbəsində direktor müavini vəzifəsinədək yüksəlib.


Müəllif: