Fazil Məmmədov: “Dünya möhtəşəm idman bayramının şahidi olacaq”

İyun ayının 12-də vergilər naziri, 1-ci dərəcəli dövlət vergi xidməti müşaviri, Azərbaycan Velosiped İdmanı Federasiyasının prezidenti Fazil Məmmədov Beynəlxalq Velosipedçilər İttifaqının prezidenti cənab Brayn Kuksonu qəbul edib.

Bu barədə Teleqraf.com-a Vergilər Nazirliyinin analitik-informasiya şöbəsindən məlumat verilib.
1-ci Avropa Oyunlarının rəsmi açılış mərasimində iştirak etmək üçün ölkəmizdə səfərdə olan qonağı səmimi salamlayan Fazil Məmmədov bildirib ki, bu gün həm Azərbaycan, həm də dünya ictimaiyyəti möhtəşəm bir idman bayramının şahidi olacaq. Ölkəmizin iki ildən artıq hazırlaşdığı 1-ci Avropa Oyunları bu gün start götürəcək və 17 gün müddətində idmanın müxtəlif növləri üzrə öz azarkeşlərini sevindirəcək.

Fazil Məmmədov qeyd edib ki, ilk Avropa Oyunlarında velosiped idmanının 3 növü üzrə yarışlar keçiriləcək. Bu məqsədlə ölkəmizdə müvafiq infrastruktur yaradılıb. Veloparkın ərazisində inşa olunmuş Avropa Oyunlarında istifadə olunacaq BMX veloparkı və dağ velosipedi parkı Beynəlxalq Velosipedçilər İttifaqının standartlarına tam cavab verir. Burada yüksək səviyyəli qonaqlar, idmançılar, əlil tamaşaçılar və mətbuat nümayəndələri üçün xüsusi yerlər nəzərdə tutulub.

Azərbaycanda son illərdə velosiped idmanının sürətlə inkişaf etdiyini bildirən Fazil Məmmədov ilk Avropa Oyunlarında Azərbaycan velosipedçilərinin də yaxşı nəticələr göstərəcəyinə böyük ümidlər bəslədiyini bildirib.

Cənab Brayn Kukson səmimi qəbula görə minnətdarlığını bildirib, 1-ci Avropa Oyunlarının rəsmi açılış mərasimində iştirakından məmnunluğunu ifadə edib. Bakı 2015 Avropa Oyunlarının yarış cədvəlinə daxil edilmiş velosiped idmanının üç növü - BMX, dağ və şosse yarışlarında 300-dən çox idmançının iştirak edəcəyini, bu yarışların hamısında 2016-cı ildə Rio de Janeyroda keçiriləcək Olimpiya Oyunları üçün lisenziya xalları əldə etmək imkanlarının olacağını da vurğulayıb.

Beynəlxalq Velosipedçilər İttifaqının üzvlüyünə qəbul olunmuş gənc ölkələrdən olmasına baxmayaraq, Azərbaycanda velosiped idmanının sürətlə inkişaf etdiyindən razılığını ifadə edən Brayn Kukson “Tour d`Azerbaidjan” beynəlxalq yarışının artıq UCİ-nin təqvimində öz yerini möhkəmlətdiyini, Azərbaycan velosipedçilərinin bir çox beynəlxalq yarışlarda uğurla çıxış etdiyini də diqqətə çatdırıb. O dünən “Synergy Baku” komandasının üzvü Maksim Averinin Slovakiya turunun ikinci mərhələsində birinci yerə çıxmasının Azərbaycan velosipedçilərinin hazırlıq səviyyəsinin yüksək olduğuna dəlalət etdiyini, Bakıya qayıtdıqdan sonra velosipedçilərimizin Avropa Oyunlarında da yüksək yerlər tutacağına ümid etdiyini bildirib.

2013-cü ilə qədər 17 il İngiltərənin Velosiped Federasiyasına rəhbərlik etdiyini və Milli Federasiyaların üzləşdikləri problemlərə yaxından bələd olduğunu qeyd edən Brayn Kukson Azərbaycan Velosiped Federasiyasının son bir neçə il ərzində çox böyük işlər gördüyünü vurğulayaraq, ona həmişə dəstək verməyə, azərbaycanlı velosipedçilərin, mexaniklərin və məşqçilərin UCİ-nin İsveçrədəki təlim bazasında öz peşə hazırlıqlarını yüksəltməyə şərait yaratmağa hazır olduğunu da nəzərə çatdırıb.

Görüşdə 2018-ci ildə BMX üzrə Dünya Çempionatının Azərbaycanda keçirilməsi ilə bağlı məsələlər də müzakirə edilib.

Naibə QURBANOVA