19 May 13:30
697
12 Punto 14 Punto 16 Punto 18 Punto

“Kreml radikal müxalifətin Nikol Paşinyanı devirmək gücündə olmadığının fərqindədir”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Ermənistanın ictimai-siyasi həyatındakı son gəlişmələrə diqqət çəkib:

“Ermənistanın radikal müxalifəti yeni hədəf tapıb, o, ABŞ-ın İrəvandakı səfiri Linn Treysidir.

Xanım səfir “Armenpress” agentliyinə müsahibəsində deyib ki, Amerika erməni xalqına gələcək qurmaqda dəstəyini davam etdirəcək: “Erməni xalqı 2018-2021-ci illərdə seçki və demokratiya yoluna üstünlük verdiyini göstərib”.

Bununla amerikalı diplomat demək istəyib ki, ermənilər iki dəfə Nikol Paşinyana səs veriblər və buna görə Vaşinqton onu dəstəkləyir, küçədə bağıranların isə demokratiya ilə əlaqələri yoxdur.

Səfirin açıqlaması radikal müxalifət liderlərinin qəzəbinə səbəb olub. Onlar səfiri onda ittiham ediblər ki, xanım Treysi demokratiyadan danışarkən, küçədə döyülən və həbs olunan insanları görmür, buna münasibət bildirmir. Küçədə “döyülənlər” və həbs edilənlər Rusiyanın təsiri altına olan insan və qüvvələrdir. Bu halda Vaşinqton Rusiyanın dəstəkçilərinə və Paşinyanı devirmək istəyənlərə niyə dəstək verməli və ya həbs edilənlərin taleyi ilə maraqlanmalıdır?”.

Elxan Şahinoğlu vurğulayıb ki, radikal müxalifətin təmsilçiləri ABŞ səfirini tənqid edərkən, Kremlin daha çox xoşuna gəlmək istəyirlər:

“Bəllidir ki, Kreml Amerikanı tənqid edənləri yanında görmək istəyir. Buna baxmayaraq, Kreml radikal müxalifətin Nikol Paşinyanı devirmək gücündə olmadığının fərqindədir. Buna baxmayaraq, yalandan məlumat yayırlar ki, guya Paşinyan Kollektiv Təhlükəsizlik Müqaviləsi Təşkilatının son toplantısında Rusiya prezidentindən xahiş etmək istəyib ki, təşkilat yanvar ayında Qazaxıstanda olduğu kimi Ermənistana da hərbi qüvvələr göndərsin. Bu Paşinyan əleyhinə xəbər təxribatına bənzəyir. Ermənistan polisi Paşinyana tabedir və küçədəkiləri neytrallaşdırır. Bu halda, Paşinyanın kənar müdaxiləyə niyə ehtiyacı olsun?”.


Müəllif: Mənsur Rəğbətoğlu