“Robert Köçəryan Rusiyanın “dobro”su ilə...” – Melkonyan

Belarus Prezidenti Aleksandr Lukaşenko təhkimçi statusunda yaşayır, biz o statusda yaşamaq istəmirik.

Teleqraf.com xəbər verir ki, bunu Ermənistanın hakim partiyasının deputatı Qaqik Melkonyan Belarus Prezidenti Aleksandr Lukaşenkonun İrəvanın KTMT-yə üzvlüyünü dondurması ilə bağlı açıqlamasını şərh edərkən söyləyib.

“Lukaşenko çox şey deyə bilər. Onun əsas çıxışı Ermənistanın hara qaçmalı olduğu tezisi üzərində qurulub. Lukaşenko təhkimçi statusunda yaşayır, biz o statusda yaşamaq istəmirik. Biz müstəqil ölkə olmaq istəyirik, kimlə istəsək görüşə və onunla müqavilə bağlaya bilərik”, - Melkonyan qeyd edib.

Ermənistanın bundan əvvəl müstəqil olub-olmadığını soruşulduqda deputat belə cavab verib:

"Yox. Rusiyadan asılı idik. Rusiyanın köləsi idik, çünki Rusiya bizə hər şeyi diktə edirdi - hansı ölkə ilə görüşməyi, ünsiyyət qurmamağı...".

Siyasətçi keçmiş prezidentlər Robert Köçəryan və Serj Sərkisyanın Rusiyanın xeyir-duası ilə hakimiyyətə gəldiklərini etiraf edib:

"Bizdə kim prezident olurdusa, demək, Rusiyanın "dobro"sunu almışdı. Müdafiə nazirləri də bu yolla təyin edilirdi".

Melkonyanın Ermənistanın niyə KTMT-dən çıxmaması ilə bağlı suala cavabı belə olub: “Yaxşı gedirik. Vaxtı gələndə hər şeyi edəcəyik”.