Gürcüstanda yol qəzası: İki azərbaycanlı yeniyetmə öldü, qarşıdurma yarandı

Gürcüstanda Marneuli-Bolnisi yolunda avtomobil qəzası baş verib.

Teleqraf.com xəbər verir ki, soydaşlarımızın yaşadığı Naxiduri (Arıxlı) kəndi yaxınlığında qeydə alınmış hadisə nəticəsində qohum olan iki yeniyetmə ölüb.

Soydaşlarımız olan yeniyetmələrdən biri hadisə yerində, digəri isə xəstəxanaya çatdırılandan sonra dünyasını dəyişib.
Qəza zamanı digər iki şəxs də xəsarət alıb, onların vəziyyətinin sabit olduğu bildirilir.

Naxiduri sakinləri hadisə yerinə gəlmiş təcili-tibbi yardım maşınının ilk olaraq xəsarət alanlara deyil, qəzanı törədən avtomobilin sürücüsünə köməklik göstərməsinə etiraz ediblər. Qarşıdurma zamanı təcili-tibbi yardım maşını və qəza törədən avtomobil aşırılıb. Hadisə yerində gərginlik yarandığından əraziyə xüsusi polis qüvvələri cəlb olunub.

Sürücünün içkili vəziyyətdə olduğu və hadisə yerindən qaçmağa cəhd etdiyi bildirilir.