Kvaratsxeliya və Xusanov ən bahalı transferlər siyahısında

"TNT Sports" portalı yanvarda dünya futbolunda həyata keçirilmiş ən bahalı transferlərin siyahısını tərtib edib.

Teleqraf.com xəbər verir ki, reytinq cədvəlində İngiltərənin “Mançester Siti” klubunun 4 transferi yer alıb.

Siyahıda Gürcüstan millisinin üzvü Xviça Kvaratsxeliya 3-cü, Özbəkistan yığmasının futbolçusu Abdukodir Xusanov isə 7-cidir.

İlk 10-luq:

1. Con Duran - 77 milyon avroya İngiltərə "Aston Villa"sından Səudiyyə Ərəbistanı "Əl-Nəsr"inə keçib.
2. Ömər Marmuş - 75 milyon avroya Almaniyanın "Ayntraxt Frankfurt" klubundan "Mançester Siti"yə keçib.
3. Xviça Kvaratsxeliya - 70 milyon avroya İtaliyanın "Napoli" klubundan Fransa PSJ-sinə transfer olunub.
4. Niko Qonzales - 60 milyon avroya Portuqaliya "Portu"sundan "Mançester Siti"yə keçib.
5. Xavi Simons - 50 milyon avroya PSJ-dən Almaniyanın "Leyptsiq" klubuna keçib.
6. Qaleno - 50 milyon avroya "Portu"dan Səudiyyə Ərəbistanının "Əl-Əhli" klubuna transfer olunub.
7. Abdukodir Xusanov - 40 milyon avroya Fransa "Lans"ından "Mançester Siti"yə transfer olunub.
8. Viktor Reis - 37 milyon avroya Braziliyanın "Palmeyras" klubundan "Mançester Siti"yə keçib.
9. Luis Enrike - 33 milyon avroya Braziliyanın "Botafoqo" klubundan Rusiya "Zenit"inə keçib.
10. Santyaqo Ximenes - 32 milyon avroya Niderlandın "Feyenoord" klubundan İtaliya "Milan"ına transfer olunub.

Qeyd edək ki, futbol tarixinin ən bahalı transferi PSJ-yə məxsusdur. Paris klubu 2017-ci ildə İspaniya "Barselona"sından 222 milyon avroya Neymarı heyətinə qatmışdı.