Arif Babayev: “Avropa Oyunlarının Azərbaycanda keçirilməsi tarixi hadisədir”

“Bakı 2015" Avropa Oyunlarının Azərbaycanda keçirilməsi böyük hadisədir. Bu möhtəşəm tədbirin Azərbaycanda keçirilməsi ölkəmizin bütün dünyada tanınmasında misilsiz rol oynacaq”.

Bu sözləri Teleqraf.com-a açıqlamasında xalq artisti, sevilən xanəndə Arif Babayev deyib. Onun sözlərinə görə, Oyunlar zamanı Azərbaycan bütün dünyanın diqqət mərkəzində olacaq: “Mən hər zaman ölkəmlə, vətənimlə fəxr etmişəm. İndi də fəxr edirəm ki, belə möhtəşəm tədbir Azərbaycanda keçirilir. Çox gözəl və tarixi hadisədir. Hər bir azərbaycan vətəndaşı da bunu belə başa düşür. Bilirsiniz ki, Azərbaycan balaca amma iqtisadi, mədəni cəhətdən çox güclü ölkədir, bu Oyunlar zamanı dünya dövlətinin diqqəti Azərbaycana yönələcək. İnanıram ki, Avropa Oyunları çox gözəl keçəcək və biz çoxlu medallar qazanacağıq. Ona görə mən idmançılarımıza uğurlar, qalibiyyət arzu edirəm”.

Xanəndə bildirib ki, Azərbaycan bu Oyunlara təşkilatçılığı ilə yanaşı qonaqpərvərliyi ilə də ölkəmizə gələn qonaqları təəccübləndirəcək: “Azərbaycan qonaqpərvər ölkədir. Bunu yarışlarda iştirak edən idmançılarla yanaşı ölkəmizə gələn turistlər də hiss edəcək. Onlar Azərbaycanı daha yaxından tanıyıb, sevəcəklər və qonaqpərvərliyimizə heyran qalacaqlar. Hesab edirəm ki, hər birimiz bu Oyunlara öz töhfəmizi verməliyik”.

Nərmin