Qarışqalar doğmalarımızın cəsədində - Video

Aqşin Evrənin “Erkən yura dövrü” şeiri.

Teleqraf.com-un “Xəzərin səsi" layihəsində bu dəfə Aqşin Evrəndir.

Mətn:

Erkən Yura dövrü

Ayaqqabısı cırıq atanın

əlində çörək evə getməsindən böyük kədər yoxdu

Çörəyin istisi unutdurur ayağının üşüməsini

Qulağı küçə boyu axtarır

evdə yuxulayan oğlunun səsini

Yeri dimdikləyən quşlar

qaytarmaq istəyir bizə ölmüş doğmalarımızı

Qarışqalar səhər yeməyini süfrəmizdə

şam yeməyini anamızın cəsədində keçirir

İndi bu böyük dünyada yalnız qarışqalar

doğmalarımızdan bizə bir tikə gətirir

Bircə bu qarışqalar qovuşdurur bizi doğmalarımıza

Dünyanın necə yaşanılmaz olduğunu

balıqlar göstərir bizə:

sudan çıxan kimi boğulub ölürlər.

İnsan da yaş ötdükcə balacalaşır

elə bil, yığılıb yenidən bətnə qayıtmaq istəyir

Elə bil, qığıltını susduran bu kilsə zəngləri,

bu azan səsi adamı ölümdən oyatmaq istəyir.