"Qarabağ" "Turan Tovuz"a, "Araz Naxçıvan" "Neftçi"yə qarşı

Bu gün futbol üzrə Azərbaycan Premyer Liqasında XX turun son oyunları keçiriləcək.

Teleqraf.com xəbər verir ki, əvvəlcə “Araz-Naxçıvan” “Neftçi”ni qəbul edəcək.

“Liv Bona Dea Arena”da keçiriləcək oyun saat 16:00-da başlayacaq. Qarşılaşmanı Rauf Cabarov idarə edəcək. Bu görüşdə zədə səbəbindən Rəhman Hacıyev, Rafael Quzzo və Dembo Darbo "Neftçi"yə kömək edə bilməyəcək.

Son 3 turda məğlub olan Muxtar Respublika təmsilçisi hazırda 39 xalla turnir cədvəlində ikinci pillədə qərarlaşıb. 3 oyundur uduzmayan paytaxt klubu isə 18 xalla 7-cidir. İki komanda arasındakı görüşlərə gəldikdə, "Neftçi" son 2 matçında qələbə qazanmayıb. "Araz-Naxçıvan" isə son 4 ev qarşılaşmasından xalsız ayrılmayıb.

Turun son görüşündə “Qarabağ” Tofiq Bəhramov adına Respublika stadionunda “Turan Tovuz”u qəbul edəcək. Saat 18:30-da başlayacaq matçın baş hakimi Cavid Cəlilov olacaq. Son 3 matçından yalnız qələbə ilə ayrılan “Qarabağ” 50 xalla turnir cədvəlində lider, son 3 matçında qalibiyyətə həsrət qalan “Turan Tovuz” isə 32 xalla 4-cüdür. Bununla belə, Tovuz komandası bu mövsüm 1 qələbə və 1 heç-heçə ilə Ağdam təmsilçisindən xal almağı bacaran yeganə komandadır. Başqa sözlə, baş məşqçi Kurban Berdıyevin komandası ilk 2 dövrənin oyunlarında "Qarabağ"a uduzmayıb. Üstəlik, Qurban Qurbanovun komandası bu matçlarda qol belə vura bilməyib.

Qeyd edək ki, XX turun əvvəlki oyunlarında “Zirə” “Şamaxı”nı 2:1, “Səbail” “Kəpəz”i 1:0 hesabı ilə məğlub edib. “Sabah” - “Sumqayıt” matçında isə qapılara qol vurulmayıb - 0:0.

Azərbaycan Premyer Liqası, XX tur

26 yanvar

16:00. “Araz-Naxçıvan” - “Neftçi”

Hakimlər: Rauf Cabarov, Zöhrab Abbasov, Teymur Teymurov, Elvin Bayramov
VAR hakimi: İnqilab Məmmədov
AVAR hakimi: Namiq Hüseynov
Hakim-inspektor: İmanxan Sultani
AFFA nümayəndəsi: Elçin Mehtiyev

“Liv Bona Dea Arena”

18:30. “Qarabağ” - “Turan Tovuz”

Hakimlər: Cavid Cəlilov, Müslüm Əliyev, Eyyub İbrahimov, Kamranbəy Rəhimov
VAR hakimi: Əliyar Ağayev
AVAR hakimi: Zeynal Zeynalov
Hakim-inspektor: Ceyhun Haşımov
AFFA nümayəndəsi: Seymur Səlimli
Tofiq Bəhramov adına Respublika stadionu