Trampın Ermənistan siyasəti çox fərqli olacaq – Sərkisyan

ABŞ Prezidenti Donald Trampın Ermənistanla ikitərəfli münasibətlərdə sələfi Co Bayden qədər fəal olmayacaq.

Teleqraf.com xəbər verir ki, bunu erməni politoloq Suren Sərkisyan deyib.

Ekspertin fikrincə, Bayden ABŞ-dəki erməni diasporu və lobbisinin “maarifləndirməsi” sayəsində regionu daha yaxşı tanıyıb, bu səbəbdən yanaşması daha “dərin” olub: “Baydenin ermənilərlə kifayət qədər yaxşı əlaqələri vardı. Hətta gənc yaşlarından senator kimi ABŞ tarixinin ən ermənipərəst siyasətçilərindən biri hesab olunurdu”.

Sərkisyan hesab edir ki, ermənilərlə o qədər də yaxşı əlaqələrə malik olmayan Tramp region haqda az məlumatlıdır: “Ona görə də onun xarici siyasəti Co Baydeninkindən çox fərqli olacaq - bütün istiqamətlərdə və bütün məsələlərdə. Fundamental olmasa da, ən azı çox əhəmiyyətli fərqlərə malik olacaq”.

Politoloq əlavə edib ki, siyasi xətlərdəki fərq yaxın həftələrdə nəzərə çarpacaq.