Ağcabədidəki partlayışda ölən və yaralananların siyahısı açıqlandı, cinayət işi başlandı - ADLAR-YENİLƏNDİ

Ağcabədidə baş vermiş partlayışla bağlı cinayət işi başlanıb.

Bu barədə Teleqraf.com-a Baş Prokurorluğun Mətbuat xidmətindən bildirilib.

Qeyd olunub ki, Ağcabədi rayonunun Hindarx qəsəbəsində baş verən parlayış nəticəsində 5 nəfər ölüb (onlardan 3-ü yetkinlik yaşına çatmayan şəxsdir):

1. Quliyev Şamiq Əfqan oğlu (1959);

2. Quliyev Bəhruz Şamiq oğlu (1983);

3. Məmmədli Məhəmməd Vidadi oğlu (2015);

4. Məmmədli Murad Vidadi oğlu (2018);

5. Quliyev Natiq Namiq oğlu (2018),

2 nəfər isə müxtəlif dərəcəli bədən xəsarətləri alıb:

1. Quliyeva (Məmmədova) Ülviyyə Şamiq qızı (1985);

2. Quliyeva Aysun Namiq qızı (2015).

Faktla bağlı Ağcabədi rayon prokurorluğunda Cinayət Məcəlləsinin 124.2-ci (ehtiyatsızlıqdan iki və ya daha çox adam öldürmə) və 228.1-ci (qanunsuz olaraq döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə cinayət işi başlanaraq ibtidai istintaq aparılır.

***

13:30

Ağcabədi rayonunun Hindarx qəsəbəsində partlayan qumbaranı zibillikdən azyaşlı uşaq tapıb.

Bu barədə Teleqraf.com-a danışan Ağcabədi rayonu Hindarx qəsəbəsinin keçmiş bələdiyyə sədri Təvəkkül Abbasov bildirib.

Onun sözlərinə görə, mərhum Quliyev Şamiq Əfqan oğlunun azyaşlı övladı zibillikdən qumbaranı tapıb və evə gətirib. Uşaq qumbaranı göstərən zaman partlayış baş verib.

"Şamiq Quliyev qəsəbə sakinidir, təsərüffatla məşğul idi. Hadisədə ölənlər bir ailənin üzvüdür. Qızı, oğlu, nəvələrinin vəfat etdiyi bildirilir. Sakit ailəydilər", - deyə Abbbasov bildirib.

***

13:21

TƏBİB Ağcabədidə baş vermiş partlayışda xəsarət alanlarla bağlı açıqlama verib.

Qurumdan Teleqraf.com-un sorğusuna cavabda deyilir ki, 31 yanvar 2025-ci il tarixində saat 11:30 radələrində partlayış səbəbilə xəsarət alan 2 nəfər Ağcabədi Rayon Mərkəzi Xəstəxanasına hospitalizasiya olunub:

"Onlardan 1985-ci il təvəllüdlü (qadın cinsli) şəxsə aşağı ətrafın qapalı travması, 2014-cü il təvəllüdlü (qadın cinsli) azyaşlıya isə aşağı ətrafın sıyrılmış-deşilmiş yarası diaqnozları təyin olunub.

Xəsarət alan şəxslərə zəruri tibbi yardım göstərilib və tibb müəssisəsinin Cərrahiyyə şöbəsində müalicələri davam etdirilir.

Hazırda hər ikisinin vəziyyəti orta ağır olaraq qiymətləndirilir".

***

Ağcabədidə partlayış zamanı ölənlərdən 3-ü azyaşlıdır.

Teleqraf.com xəbər verir ki, hadisə zamanı Bəhruz Quliyev, Şamiq Quliyev, Natiq Quliyev, Məhəmməd Məmmədli və Murad Məmmədli ölüb.

Ülviyyə Məmmədli və Aysun Quliyeva müxtəlif dərəcəli xəsarətlərlə xəstəxanaya aparılıb.

***

12:48

Yanvarın 31-də saat 12 radələrində Ağcabədi rayonunun Hindarx qəsəbəsində yerləşən evlərdən birində 5 nəfərin ölməsi, 2 nəfərin yaralanması ilə nəticələnən partlayışın baş verməsinə dair rayon prokurorluğuna məlumat daxil olub.

Teleqraf.com xəbər verir ki, bu barədə Baş Prokurorluğun Mətbuat xidməti bildirib.

Hazırda prokurorluq əməkdaşları tərəfindən hadisə yeri müayinə olunur və digər zəruri prosessual hərəkətlər icra edilir.

Faktla bağlı Ağcabədi rayon prokurorluğunda araşdırma aparılır.