Sevgilisinin intim görüntülərini yayan oğlana cəza verildi

Azərbaycanda sevgi münasibətində olduğu qızın yarıçılpaq görüntülərini İnstagram sosial şəbəkəsində yaymış şəxs cinayət məsuliyyətinə cəlb edilib.

Teleqraf.com-un əldə etdiyi məlumata görə, Şamaxı rayon sakini olan 2002-ci il təvəllüdlü A.İbrahimov Cinayət Məcəlləsinin 148-1 və 156-cı (Təhqir və şəxsi həyatın toxunulmazlığını pozma) maddələri ilə mühakimə edilib.

Araşdırmalarla müəyyən edilib ki, A.İbrahimov bir müddət əvvəl sosial şəbəkədə Sumqayıt şəhər sakini olan Aytən (şərti adlı) adlı qızla tanış olub. Onlar bir neçə dəfə Sumqayıtdakı parkda görüşüblər və aralarında sevgi münasibəti yaranıb. Həmin müddət ərzində görüntülü zəng vasitəsilə danışarkən A.İbrahimov Aytəndən soyunmasını xahiş edib və bu zaman onun görüntülərini telefonunun yaddaşına köçürüb.

Bir neçə ay əvvəl isə onların münasibəti pozulub. A.İbrahimov Aytənin adına sosial şəbəkədə səhifə yaradaraq onu rüsvay etmək məqsədilə çəkdiyi görüntüləri orada yerləşdirib.
Aytən hadisədən xəbər tutduqdan sonra hüquq-mühafizə orqanlarına müraciət edib.

Şamaxı rayon Məhkəməsində keçirilən prosesdə A.İbrahimov törətdiyi əmələ görə peşman olduğunu və üzr istədiyini deyib.

Məhkəmənin 22 yanvar tarixli hökmü ilə gənc oğlan 2 min manat cərimə cəzasına məhkum edilib. Onun barəsindəki polisin nəzarəti altına vermə qətimkan tədbiri qüvvədə saxlanılıb.