Notr-Dam kilsəsi beş ildən sonra açıldı

Fransanın paytaxtı Parisdə restavrasiyadan sonra Notr-Dam kilsəsinin rəsmi açılışı olub.

Teleqraf.com xəbər verir ki, bu münasibətlə keçirilən mərasimi "BFMTV" telekanalı yayımlayır.

Açılış şənliyi zənglərin çalınması ilə başlayıb. Bundan sonra Paris arxiyepiskopu, monsenyor Loran Ulrix kafedralın qapısını döyüb və bununla da mərasim başlayıb.

Tədbir zamanı Notr-Dam kilsəsində baş vermiş yanğın və onun bərpası üçün mütəxəssislərin işindən bəhs edən sənədli film nümayiş etdirilib.

Açılışda Fransa prezidenti Emmanuel Makron və Fransanın birinci xanımı, ABŞ-nin yeni seçilmiş prezidenti Donald Tramp, Ukrayna lideri Volodimir Zelenski, Almaniya prezidenti Frank-Valter Ştaynmayer və İtaliyanın baş naziri Ciorcia Meloni, Şahzadə Uilyam, ABŞ-nin birinci xanımı Cil Bayden və onun qızı, amerikalı milyarder İlon Mask iştirak edib.

2019-cu il aprelin 15-də Notr-Dam kilsəsində güclü yanğın baş verib. Hadisə nəticəsində kilsənin damının bir hissəsi uçub, həmçinin daxili hissəsi zədələnib.