Hansı şairin misraları heç vaxt dilinizdən düşmür? - 100 oxucu

Hər birimizin ən özəl anlarımızda dərhal beynimizdə, dilimizdə təkrarlamağa başladığımız misralar var. Sanki o anda o bir neçə misra qədər həyatımızı heç nə dəqiq ifadə edə bilməz.

Teleqraf.com bu tip misralar movzusunda oxucularla sorğu keçirib. Sorğuda 100-ə yaxın oxucu iştirak edib.

Onların cavablarını təqdim edirik.

Gulnarə Mehdiyeva

Onu heç nə gətirmir,
Aparır fikir məni... (Orxan Bahadırsoy)

Aydın Hacıyev

Qorxma pul qoymuram sənin ovcuna,
Əyilib əlindən öpürəm sənin... (Ramiz Rövşən)

Rəsul Mirzəyev

Sən orda göyə baxırsan,
Burda məni yer aparır... (Ramiz Rövşən)

Günay Vahidsoy

Səndən də heç gözüm su içməmişdi,
Bu qədər göz yaşı hardandı məndə? (Xəzər Süleymanlı)

İslam Qasım

Görürsənmi? Amma necə görəsən,

qurtarmayıb hələ də aramızdan keçən

qatarın vaqonları... (Vaqif Səmədoğlu)

Elnurə Rzazadə

Bəlkə də biz xoşbəxt ola bilərdik,
Bəlkə də xoşbəxtik xəbəriniz yox... (Ramiz Rövşən)

Fatimə Mövlanlı

Allah özüm gəlim, ya kimisə göndərəcəksən? (Vaqif Səmədoğlu)

Ətayə Odər Əkbərsoy

Deyirəm, yaddaşım elə olsun ki,
Mənə dünənimi xatırlatmasın... (Bəxtiyar Vahabzadə)

Ali Abbasov

Sən vəfasız getdiyin gün bir qədər kövrəlmişəm.
Bir gözümdən sən düşərkən, bir gözümdən yaş düşüb... (Pünhan Əzimli)

Aynur Rəhimzadə

"Qərib və avara gecələrlə sevişən,

Və qorunmayan küçə şairiyəm...

Bir işıq dirəyinin kölgəsinə çəkilib,

Şeir doğuram..." (Cəlil Cavanşir)

Elçin Ağazadə

Barmaqlarım tələsər, düymələrin çözülər,

İçimə bir od düşər, titrəyər ayaqlarım,

Süd yolunda dincələr qurumuş dodaqlarım... (Qismət Rüstəmov)

Bərxudarova Günel

Mən ölüyəm, sən diri.
Mən qocayam, sən cavan.
Alnımın qırışına ilişərsən gen dolan... (Ramiz Rövşən)

Aytac Mərdanova

Sən mənim qədrimi biləsən deyə,
Bu cavan yaşımda ölümmü indi? (Əli Kərim)

Abdurraxim

Qəbrimin üstə dodaq izlərini öpmək üçün

Allahımdan da xəbərsiz diriləydim gecələr... (İlqar Fəhmi)

Qəmər Qəmər

Bir daha adını ağzıma alsam,

İnan ki, dilimi kəsəcəm, adam! (Qəmər)

Amil Ağayev

Ey könül, gedəndən ümidini kəs,
Gedən bir xəyala bənzəyir hər kəs... (Nəcib Fazil)

Dilarə Zamanova

Bahar ağaclardan çəkilən kimi,
Çəkildi başımdan gənclik sevdası... (Vaqif Bayatlı Odər)


Aynurə Şıxlı

İndi yaya qış deyirəm,
Sabiq qışa yay demişəm... (Məmmədhüseyn Şəhriyar)

Əli Nurəliyev

Allah inciməsin məndən,
Elə Allahım kimisən... (Habil Rzanur)

Samirə Əliyeva

Yandı canım hicr ilə vəsli-ruxi-yar istərəm.
Dərdiməndi firqətəm dərmani-didar istərəm... (Məhəmməd Füzuli)

Camal Nəzərov

Sənli xatirələr dağılıb evə,
Bağışla, otağım tör-töküntüdür... (Salam Sarvan)

Baba Abbasov

Sənsiz keçən günlərim oxşayır bir-birinə -

Sənsiz keçən günlərin yaxşısı, pisi yoxdu... (Baba Vəziroğlu)

Səbinə Tağıyeva

Səni sevdim, qar üstündə yem axtaran quş kimi... (Ramiz Rövşən)

Nəcməddin Rəhimov

Mən sənə sevirəm deyə bilmərəm,
Bu söz çox kişinin dilinə dəyib... (Mirbədəl Hüseynli)

Səyyarə Elxan

Harda axtarım səni,

Söylə hansı əsrdə?

Hansı monastırdasan?

Hansı uzaq qəsrdə? (Aqşin Yenisey)

Mərifət Ağazadə

Mən gedər-gəlməzdən dönməyib ölsəm,
Üzülmə bir dənəm, adam ölər də... (Əjdər Ol)

Paşa Ocaqlı

Uvuz insanların ucuz adına,
Bahalı içkilər içib gedəsən... (Cavid Günəşli)

Xəqani Kərimov

Nə qədər zirvəyə qalxıb ucalsan,

Sən qalxan zirvəyə enən deyiləm... (Bəxtiyar Vahabzadə)

Elvin Nasirov

O sizin adicə qızınızdırsa,
Mənimsə yeganə səadətimdir... (Nəriman Həsənzadə)

Elşad Əhmədov

Bilsən, gözəlim, sən nə qədər sevgili cansan,

Zülm eyləmə, qoy söyləməsinlər can alansan. (Əliağa Vahid)

Ələsgər Sönməz

Mən şəhərdə gəzəndə

insanlar biradamlıq kənardan keçirlər,

sanki yanımda yeriyirsən deyə... (Salam Sarvan)

Bəbir Tarverdiyev

Zahid, məni aldatma cəhənnəmdə od olmaz,

Onlar ki yanarlar odu burdan apararlar. (Seyyid Əzim Şirvani)

Sərxan Əhmədov

Ey bülbüli-qüdsi, nə giriftari-qəfəssən?
Sındır qəfəsi, tazə gülüstan tələb eylə... (İmadəddin Nəsimi)

Ələsgər Əhməd

Atan da, anan da yanında yatıb

Necə danışaq ki, eşidilməsin? (Musa Yaqub)

Günel Tahirli Cansu

Mənə bir az ondan danış... (Vuqar Rahi)

Kənan Dalğa

Tək o Allahdır eyibsiz, ona xasdır hər gözəllik,

Hərənin bir eybi vardır, hamı eybəcər deyilmi?! (Oqtay Kamil)

Günay İsmayılova

Hər gecə qandallanır ürəyim

darıxmağa...

əvvəlcə axşam düşür,

sonra mənim ürəyim... (Qismət Rüstəmov)

Səfa Rəşid

Sənin ad gününə gül dərmək uçun

Sinəmə çəkdiyin dağa çixiram... (Salam Sarvan)

İlkin Asiman

Nə vaxt görüşmüşük? Harda? Nə zaman?

Doğrusu, elə bil, yadımdan çıxıb... (Əli Kərim)

Məhəmməd Turan

Çünki, sən gözəldin, gözəl görünmək

Heç kəsə bu qədər yaraşmamışdı... (Kamal Abdulla)

Kəmalə Feyzullayeva

Küləyə söylədim ki, səndən hər axşam-səhər,

mənə gətirsin xəbər... (Xəzər Süleymanlı)

Musəvi Xəyalə

Mənimki eşq deyil, divanəlikdi

Düşərsən ismətdən-abırdan qayıt... (Həjar Şamiloğlu)

Ədalət Şahbazov

Yenə bu şəhərdə üz-üzə gəldik,
Neyləyək, ayrıca şəhərimiz yox... (Ramiz Rövşən)

Orxan Məmmədov

Gah əsgər, gah xəstə, gah dustaq oldum,

Qoymadım quruya gözün anamın. (Sücaət)

Aydan Ay

Hamı günahkardı dünyada, amma

Dünyada heç kəsin günahı yoxdu... (Ramiz Rövşən)

Əntiqə Səməndər

Sənə gözlərimdə yer saxlamışam,

Bilirsən necədir sevda yerləri... (Esmira Məhiqızı)

Anar Ağayev

Mən qələmdən qəm götürsəm

qəm qalar yalnız mənə... (Pərviz Arif)

Turğay Camal

Məni bundan sonra orda axtarın,

Gedirəm tüstünün gəldiyi yerə. (Elşən Mehdi)

Rəhim Həsənov

Ayrılıq bir cümlədir, ancaq ümidim var yenə

Nöqtəsin axırda qəsdən qoymuşam vergül kimi... (Pünhan Əzimli)


Aygün Nuray

Görünür məndən ötəri

Hardasa ölüm darıxır... (Ramiz Rövşən)

Tural Musayev

Kim ki, insanı sevər aşiqi-hürriyyət olar,

Bəli, hürriyyət olan yerdə də insanlıq olur. (Mirzə Ələkbər Sabir)

Elşən Mehdi

Adamdan adama ötüb keçmisən,

Piyada keçidi olmuşam sənə... (Elvin Paşa)

Elvin Paşa

Başı batmış heykəlləri

Göyərçinlər xəbər verir... (Elşən Mehdi)

Zəhra Ağayeva

Dünən nə yediyim yadımdan çıxıb,

Sən mənim yadımda çətin qalarsan... (Elkin Kərimli)

Cabbar Çətin

Dünya ucuz sandı, ya baha bildi

Nə satan tapıldı, nə alan məni. (Ramiz Rövşən)

Aqil Səmədzadə

Ölüm - ömrün ən gözəl

çağında haşiyəyə

çıxmaqdır. (Elşən Mehdi)

İsrail Fərhad

Yaxşı ki, bircə yol dəli deməklə,

Bircə yol adama oxşatdın məni. (Salam Sarvan)

Nərcis Əskəri

Bağrımı qan eylədi acı fərağın, gəl, yetiş!

Ey ləbi vəslət, şərabı-xoşgüvarım, hardasan?! (İmadəddin Nəsimi)

Rauf Muradov

Nə xoşbəxt imişəm bir zaman, Allah... (Əli Kərim)

Pərviz Arif

Uşaq idim.

Səhv edəndə gözlərini ağardaraq

qorxudardı anam məni.

Nə biləydim böyüyəcəm,

saçlarını ağardaraq qorxudacaq anam məni. (Rəşad Nağı Mustafa)

Lalə Əliyeva

Dünyayla savaşmaq asanmış demə,
Çətini özünlə barışmaq imiş... (Ramiz Rövşən)

Fəqan Haqverdiyev

Yetimlik uşağın özünün belə,
Kimə çəkdiyini bilməməyidir... (Elşən Mehdi)

İradə Qarayeva

Cəhənnəm çəkirəm savaba görə... (Musa Yaqub)

Sədi Şirinov

Ay qaranlıq, ulduzlar yox,

Yaman ölməli gecədir... (Vaqif Səmədoğlu)

Kərim Abi

Otağım xatirәlәrlə doludur, yox qorxum,

Ki, ölüm gәlsә dә sığmaz bura, dәhlizdә qalar. (Pünhan Əzimli)

Könül Rəcəbli

Ana! Ana!.. O adın qarşısında bir qul tək

Həmişə səcdədə olmaq mənə fəxarətdir! (Cəfər Cabbarlı)

Zəhra Əliyeva

Hərdən onun toxunduğu yerlər qopar bədənindən...
Hissə-hissə yoxa çıxarsan hərdən... (Aqşin Evrən)

Gülnarə Bayramova

Sıxılarsan, bilməzsən hara qoyasan bu nəhəng ayrılığı.
Görərsən, saçların onun çiyni üçün darıxır... (Aqşin Evrən)

Xədicə Namazlı

Ruhum nə vaxtdır, ölüb, cənazəsi qılınmır

Danışıram alınmır...

Danışmıram alınmır... (Elşən Mehdi)

Mərahim Nəsib

Bu gecə üstümü örtən olmayıb,

Bu gecə yamanca soyuqlamışam. (Məmməd Araz)

Heydər Səfərli

Yenə o bağ olaydı, yenə yığışaraq siz,
O bağa köçəydiniz... (Mikayıl Müşfiq)

Seyran İsmayılov

Susuzluqdan səngərdə ölən əsgərin

Gedərkən arxasınca su atmışdılar

Onu aldatmışdılar... (Qismət Rüstəmov)

Rayihə Əliyeva

Bilirəm ki, deməyəcək, bir sevgilim, bir də vətən,
Şair, nə tez qocaldın sən? (Səməd Vurğun)

Gülbəniz Abbasova

Ya Rəbb, bəlayi-eşq ilə qıl aşina məni.

Bir dəm bəlayi-eşqdən etmə cüda məni. (Məhəmməd Füzuli)

Vəzir Mirzəyev

İki şey ağıla nöqsan sayılar,

Yersiz susmaq ilə yersiz söz demək! (Sədi Şirazi)

Elçin Hüseynov

Sənin ad gününə qəsdən gecikdim,

Mən səni bir az da cavan saxladım. (Əlizadə Nuri)

Elen İsmayıl

Sən ağlım və ürəyim arasında qalan ən gözəl çarəsizliyimsən... (Camal Sürəyya)

Azər Quluzadə

Sən qız xeylağısan, adın Sevincdi,

Sən kişi deyilsən, adın dərd deyil. (Salam Sarvan)

Şükür Əli

İndi isə gəl ölüm-ölüm oynayaq,

Əvvəl mən ölüm sən bilmə,

Sonra sən ölmə, sən ölmə. (Vaqif Bayatlı Odər)

Adil Rakidi

Nə səndə məhəbbət qara pul deyil,

Nə mən dilənçiyəm əl açım sənə... (Nüsrət Kəsəmənli)

Orxan Saffari

Bu da ki sonuncu teleqramım:

Mən gələr olmadım, yolu qarşıla... (Salam Sarvan)

Jalə Jako Jalə

Ümid bir gedişlik xırda pul kimidir,

Uzaqlara apara bilmir adamı. (Kənan Hacı)

Mirbağır Bünyatlı

Hər şey bizdən böyükdür, hər şey bizdən balaca,
Ortalıqda qalmağın cəzası ayrılıqdı... (Əsəd Qaraqaplan)

Nərmin Sədiyeva

Beləcə dostum kimi,

beləcə Tanrı kimi,

beləcə anam kimi

hamı qayğıma qala. (Orxan Bahadırsoy)

Süleyman Niftəliyev

Bəs, ayrılıq nədir ki?
Bir addım...
Nə fərqi var, sən atdın, mən atdım... (İlqar Fəhmi)

Şamama Şükürlü

Mənə inam kimi bax, sinə gərim çətinə.
Mənə sevinc kimi bax, dönüm məhəbbətinə... (Zəlimxan Yaqub)

Səmral Təhməzov

Bütün mənə ağlayanlar kiridi,

Sən də kiri, qəbrim damır, ağlama... (Ramiz Rövşən)

Fərman Süleymanlı

Mən elə bilirdim sənsiz ölərəm,
Mən sənsiz ölmədim, məni bağışla... (Ramiz Rövşən)

Aydan Tağızadə

Hərdən "qayıt ölürəm" kimi oxunar

Ona yazdığın bircə "salam necəsən?” (Aqşin Evrən)

Ləman Ələşrəfqızı

Ay üzlü nigarım, kimə mehman olacaqsan?

Bir söylə, kimin şəninə şayan olacaqsan? (Nizami Gəncəvi)

Qorqud Şahverdiyev

Mürəkkəb tükənib, qəmi yazmağa,

Anadan əmdiyim südlə yazıram... (Böyükxan Pərviz)

Müslümoviç Müslümoviç

Mənim gözlərimdə həsrət iz salıb,
Körpələr evinin pəncərəsitək... (Xəzər Süleymanlı)

Daşqın Quluzadə

Elə dayanırsan, elə baxırsan,

Elə bil qarşında quru bir daşam. (Nəriman Həsənzadə)

Araz Əhməd

Üz tutduğum adamlarda,
Üzümə durdular mənim.
Bir quyuya salladılar,
İpimi qırdılar mənim. (Ramiz Rövşən)

Zümrüd Kərimova

Ya mən, ya sən, ya da biz,
Birini seç, üçündən... (Xəzər Süleymanlı)

Tunar Saleh

Barmaq ucundakı barışmaqların

Kəsdisi küsdüsü üstümə gəlir. (Esmira Məhiqızı)

İsa Həsənoğlu

Ya sən İslamı qəbul eylə mənim dinimə gəl,

Ya da təlim elə mən məzhəbi-İsayə gəlim. (Məmmədhüseyn Şəhriyar)


Nigar Əliyeva

Kim səni bağrına basacaq belə?
Soyuq əllərini kim isidəcək? (Sevinc Çılğın)

İmran Abdin

Bir gecədə doğulub, sonra ölən arzular

Bu da ki, tale yolum...

Cırılmış gündəlikdi. (Cəlil Cavanşir)

Aytən Şirin

Uzun illər boyu ayrı da qalsaq,

Eyni duyğularla vurur qəlbimiz. (Mikayıl Müşfiq)

Gül Nar

Qayıt, gözüm nuru, könlüm atəşi,

Qayıt, sahmana sal bu kainatı. (Əli Kərim)

Fəxrəddin Quliyev

Yaman bəxtəvərmiş xoşbəxt adamlar,

İndi xoşbəxtlik də tapılmır asan... (Rəvan Məmmədli)

Xanım Əliyeva

Sən axı bilmirsən

üzündən iraq –

it kimi darıxmaq nə təhər olur... (Şəhriyar Del Gerani)

Aytən Əsgərova

Bu göz yaşı məndən axır?!

Mən bu gözü tanımıram... (Vaqif Bayatlı Odər)

Sabirə Babayeva

Özündən bir az da özünə saxla... (Elman Tovuz)

Fərid Əliyev

Dilbər aydır, ey Nəsimi, sabir ol, qılma fəğan,

Mən bu gün səbr eyləsəm, danla fəğanı neylərəm? (İmadəddin Nəsimi)

Coşqun Mütəllimoğlu

Kəndiri rezinmiş dar ağacımın,
Bəxtəvər başıma, hələ dartılır... (Salam Sarvan)

Ülviyyə Tahir

Qayıt gəl, uzaqlıq qəssablar kimi

taleyin ən yaxşı yerindən kəsir. (Rəşad Nağı Mustafa)

Elgün Hüseynov

Ömür paylanan zaman görün kimə nə düşdü?!

Üç yüz il boz qarğaya, on il şahinə düşdü. (Bəxtiyar Vahabzadə)

Ramil Hikmət

Burda hava pis keçir,
Ara vermir yağışlar... (Aqşin Yenisey)

Qeyd edək ki, sorğuda ən çox adı çəkilən şair Ramiz Rövşən oldu.