"USAID “Əl-Qaidə”ni maliyyələşdirir, xaşxaş yetişdirir" - Dövlət Dumasının sədri

ABŞ-nin Beynəlxalq İnkişaf Agentliyi (USAID) dünyanın 100-dən çox ölkəsində təmsil olunan və illik büdcəsi 50-60 milyard dollar olan kriminal şəbəkəyə çevrilib.

Teleqraf.com xəbər verir ki, bunu Rusiya Dövlət Dumasının sədri Vyaçeslav Volodin deyib.

“Nizamnaməsinə görə, USAID iqtisadiyyat, səhiyyə və təhsili dəstəkləməli, həmçinin təcili humanitar yardım göstərməlidir. Amma faktiki olaraq, agentlik 100-dən çox ölkədə ofisləri və illik büdcəsi 50-60 milyard dollar olan real kriminal şəbəkəyə çevrilib”, - spiker bildirib.

Volodinin sözlərinə görə, USAID öz fəaliyyəti dövründə bəzi cinayətlərdə iştirak edib və bunları törədənlər cəzalandırılmalıdır:

“Bu gün artıq Beynəlxalq İnkişaf Agentliyinin Vaşinqtonda yerləşən mənzil-qərargahı bağlıdır. USAID-in ləğvi məsələsi müzakirə olunur. İndi törədilmiş cinayətlərdə günahkar olanların cəzalandırılması və belə halların bir daha təkrarlanmaması vacibdir”.

Spiker vurğulayıb ki, qurum bəzi terror təşkilatlarının sponsoru da olub: “USAID tərəfindən terrorçular və yaraqlılar, eləcə də ABŞ və Rusiyada qadağan olunmuş “Əl-Qaidə”yə yüz minlərlə dollar köçürüb. Bundan əlavə, agentlik xaşxaş yetişdirmək və heroin istehsal etmək üçün istifadə olunan avadanlıq və gübrələrə yüz milyonlarla dollar xərcləyib”.