Bakıya baxın, milyardlarla dollarlıq anlaşma imzaladılar – Aşotyan

Avropa İttifaqı (Aİ) üçün bölgədə əsas tərəfdaş Ermənistan yox, yaxınlarda milyardlarla dollar dəyərində anlaşma imzaladığı Azərbaycandır.

Teleqraf.com xəbər verir ki, bunu Ermənistanın müxalif Respublika Partiyasının sədr müavini Armen Aşotyan Ermənistanın Aİ-yə üzvlük perspektivlərini şərh edərkən deyib.

“İki gün əvvəl Avropa Yenidənqurma və İnkişaf Bankı Azərbaycanla bir neçə milyard dollarlıq layihə imzalayıb. Dünən Avropa rəsmiləri bildiriblər ki, 2025-ci ildə Azərbaycanla enerji sektorunda fəal qarşılıqlı fəaliyyət olacaq. Yeri gəlmişkən, Ermənistan bu baxımdan Belarus və Azərbaycanla eyni siyahıdadır”, - partiya rəsmisi bildirib.

Aşotyan qeyd edib ki, Avropa Komissiyası qonşularla əməkdaşlıqla bağlı strukturu bölüb: “Bu strukturun orqanlarından biri yalnız Yaxın Şərqlə, digəri isə qonşularla və “Şərq Tərəfdaşlığı” proqramının üzvləri ilə məşğul olacaq”.

Üzvlük haqqında düşünərkən Bakı-Brüssel münasibətlərinə baxmağa çağıran partiyanın sədr müavini hesab edir ki, Aİ üçün bölgədə əsas tərəfdaş Ermənistan yox, Azərbaycandır. O, Ermənistanın Aİ-yə üzv olacağına ehtimal vermir, Baş nazir Nikol Paşinyanın bu yöndəki səylərini mənasız hesab edir.