Növbəti il büdcədən AZAL-a ayrılan subsidiyanın məbləği artırılıb

Növbəti ildə “Bakı Metropoliteni”, “Təmiz Şəhər”ə dövlət büdcəsindən ayrılan subsidiyalar azaldılıb, “Azərbaycan Hava Yolları” Qapalı Səhmdar Cəmiyyətinə ayrılan subsidiya məbləği isə artırılıb.

Teleqraf.com xəbər verir ki, 2025-ci ildə Azərbaycanda dövlət büdcəsindən “Təmiz Şəhər” ASC-yə 29 milyon manat subsidiya ayrılacaq. Bu, 2024-cü illə müqayisədə 27,5 % azdır.

Növbəti ildə dövlət büdcəsindən “Bakı Metropoliteni” QSC-yə 27,7 milyon manat subsidiya ayrılacaq.Sənədə əsasən, bu, 2024-cü illə müqayisədə 44,7 % azdır.

“Azərbaycan Hava Yolları” Qapalı Səhmdar Cəmiyyətinə 5 milyon 944 min manat subsidiya nəzərdə tutulub. 2024-cü ildə bu istiqamətdə dövlət ayırmaları 5 milyon manat təşkil edib.

Növbəti ildə hüquqi şəxslərə ayrılan digər subsidiyalar cəmi subsidiyalarda ən yüksək paya -62% paya malik olacaq.

Ümumilikdə 2025-ci ildə dövlət büdcəsindən subsidiyalar üzrə 46 istiqamətdə 1 milyard 321,2 milyon manat vəsait proqnozlaşdırılıb. Bu da 2024-cü ilin proqnozundan 273,5 milyon manat və ya 26,1% çoxdur.