"Barselona"nın baş məşqçisi: "Möhtəşəm geridönüş etdik"

İspaniya "Barselona"sının baş məşqçisi Hans-Diter Flik komandasının UEFA Çempionlar Liqasının Liqa mərhələsinin VII turunda Portuqaliyada "Benfika" ilə oyunundan sonra fikirlərini bölüşüb.

Teleqraf.com xəbər verir ki, almaniyalı mütəxəssis 5:4 hesablı qələbə qazandıqları görüşdə xarakter nümayiş etdirdiklərini bildirib.

"İnanılmaz matç alındı. Ən pozitiv nüans oyunçularımızın xarakter nümayiş etdirməsi oldu. Möhtəşəm geridönüş etdik. Futbolun anlamı bundan ibarətdir, bizə bu idmanı sevdirən məhz budur", - deyə o vurğulayıb.

Flik oyun zamanı problemlər yaşadıqlarını da diqqətə çatdırıb: "İlk hissədə yaxşı çıxış etmədik. Keçid fazalarında rəqib bizi üstələyirdi. Dərin müdafiə olunmağa məcbur qaldıq. İkinci yarıda əvəzetmədən meydana daxil olan oyunçular matçı lehimizə dəyişə bildilər".

Qeyd edək ki, "Barselona" bu qələbədən sonra 1/8 final mərhələsinə vəsiqəni təmin edib.